Vawiin ni 27th March, 2020 khan Mizoram Assembly Speaker, Pu Lalrinliana Sailo chuan a bialchhung, Chalfilh biala khaw hrang hrang khaw 24 a COVID-19 do nana hah taka thawktu, Village Task Force zawng zawngte'n a ṭul apianga an hman turin sumfai Rs 800,000(eight lakh) bakah Surgical Glove leh Face Mask ṭhahnem tak mai a hlan.
Speaker Pu Lalrinliana Sailo chuan Sawrkar in Zoram mipui te ei leh bar kawngah mipuiten harsatna an tawh lohna turin theihtawp a chhuah zel a ni tih sawiin; AAY, PHH thlan chhuahte tan free ration Sawrkar in a sem thei tur hi a lawmawmin a ropui hle a ni, a ti a. Speaker chuan harsat mangan thu hla ah bial mipuite pui tura a inpeih reng thu sawiin, he hunkhirh tak ramin a tawn mek hi Mizo hnam, hmasang kan pi leh pu nun ze mawi Tlawmngaihna kan parchhuah tir hun ni se, Zoram mipui, Zohnahthlak zawng zawngte min phuarkhawm tu nise a duh thu a sawi a. Khawtlangah ṭhenawm khawveng chhuanchham an awm pawh a tlan chhe lova 'Sem sem dam dam ei bil thi thi' nun a tak a lan chhuah puitu ni ṭheuh turin bial mipuite a chah a.
Thuthang leh thu puarpawleng avanga chiai lo tur te, Sorkar thuchhuak ngun taka ngaithlaa thuawih taka zawm hram hram turin leh COVID-19 dolet nana thathawhtu, Sorkar hruaitute, kan Medical Team te leh Village Task Force te tan bang lova ṭawngtai zel turin Chalfilh bial mipuite a ngen a ni.