SERCHHIP DISTRICT TASK FORCE TE LAWMTHU
Serchhip District Task Force Committee on Covid-19 te chuan Covid-19 laka kan him theih nana theih tawpa hma an lakna tanpuitu, sumdawng, tlawmngaipawl leh khawtlang hruaitute, thuawi taka awm mipui zawng zawng te hnenah lawmthu an sawi a. Hmalakna te tha taka zawm zel turin mipuite a ngen bawk.
Pu Lalchamliana, Home Minister, Hrangturzo bialtu MLA chuan tunah hian a bial mipuite mamawh zual phuhrukna tur thil hrang hrang a ngaihtuah mek a, reiloteah mipuite hnen a thlen thuai beisei a ni. Er. Lalrinawma, Deputy Speaker, Tuikum bialtu MLA chuan a bial chhung khawtinte chu Plastic Tanky 200 litres theuh a pe a, khaw thenkhatin an la inphur thleng lo deuhva, MLA Fund atangin a bial chhung khuaa Task Force te hman turin pawisa Rs. 218000 a sem chhuak bawk. Serchhip Bialtu MLA Pu Lalduhoma chuan Glove medium size box 12, Mask Pocket 5 leh Hand Sanitizer Litre 15 vawiina Medical Team te hman turin a pe a. Thenzawl lamah pawh engemawzat a pe bawk.
Medical lama thawktute invenna hmanraw chi hrang hrang atan K. Lalnema Store, Serchhip Bazar chuan hmanrua tam tak pe in a thui sak bawk a, Dr. C. Vanlalnghaka, Asst. Proffesor leh Pu Zakapa te chhungkua pawhin hmanraw mamawh engemawzat an pe bawk.
Government Serchhip College ten Hand Sanitizer siamin, Bank, ATM, Police Thana, Local Task Force hote leh Hospital te hman atan an hlan a, anni mamawh thenkhat hi PHE lam ten an lo tanpui bawk a. An chungah District Task Force a lawm hle.
Veng leh khaw hrang hranga Village Level Task Force te mamawh thilpek, pawisa fai leh thil dang petute zawng zawng, kohhran, pawl leh mimal chungah lawmthu a sawi bawk.
District chhung hmun hrang hranga inkhung hrang tura tih ten thuawih taka sawrkar ruahmanna zawm a, sawrkar an thawhpuinaah lawmthu a sawi bawk.